နှစ်ပတ်ခန့် လျှပ်စစ်မီး ပျက်တောက်သွားသော ချင်းပြည်နယ်၊ ဟားခါးမြို့မှာ အင်တာနက်၀ိုင်ဖိုင်များ ပုံမှန်၀န်ဆောင်မှု မပေးနိုင်တော့သည့်အပြင် မိုဘိုင်းဖုန်းအသုံးပြုနိုင်ရေးနှင့် နေ့စဉ်ချက်ပြုတ်ရေးအပိုင်းမှာ ပိုမိုခတ်ခဲလာတယ်လို့ မြို့ခံတွေက ပြောကြပါတယ်။
“လျှပ်စစ်မီးပျက်သွားတော့ သုံးနေကျ ဝိုင်ဖိုင်တွေလည်းပျက်ကုန်တယ်။ ဖုန်းအားသွင်းဖို့အတွက် တောတောခတ်ခဲလာတယ်။ မီးစက်ရှိတဲ့တွေအိမ်တွေမှာ သွားသွင်းရတယ်။ ဒါပေမယ့် အခု ဆီဈေးလည်းကြီးတော့ သူများအိမ်မှာ ပုံမှန်ဖုန်းအားသွားသွင်းဖို့လည်း မဖြစ်နိုင်ဘူး။ ဝိုင်ဖိုင်မရတော့ ဈေးအဆမတန်ကြီးလာတဲ့ ဖုန်းဒေတာတွေကို ချွေတာသုံးရတယ်” လို့ မြို့ခံတစ်ဦးက ပြောပါတယ်။
နေ့စဉ် ချက်ပြုတ်ရေးအတွက် မီးသွေးကို ဈေးတစ်ဆပေး ၀ယ်ရပြီး ညမီးထွန်ဖို့ ဖယောင်းတိုင်တွေလည်း ဈေးမြင့်တက်လာတယ်လို့ ဒေသခံတစ်ဦးကပြောပါတယ်။
“မီးပုံမှန်ရတုန်းက မီးသွေးတစ်အိတ်ကို တစ်သောင်းလောက်နဲ့၀ယ်ရတယ်။ အခုတော့ တစ်အိတ်ကို နှစ်သောင်းနဲ့တောင်ပုံမှန် ၀ယ်စရာသိပ်မရှိတော့ဘူး။ အရင်ဖယောင်းတိုင် တစ်ထုတ်ကို တစ်ထောင်လောက်နဲ့၀ယ်ရတာ အခုတော့ ၁၅၀၀ အထိဈေးတက်သွားပြီ” လို့ပြောပါတယ်။
ဟားခါး-ဂန့်ဂေါ်လမ်း နီပီးရွာအနီးတွင် လေပြင်းကြောင့် လျှပ်စစ်တာဝါတိုင်ပျက်ဆီးသွားပြီး ယနေ့အချိန်ထိပြင်ဆင်နိုင်ခြင်း မရှိသေးဘူးလို့သိရပါတယ်။
