ဟားခါးမြို့နယ်၊ မာလ်ဆောမ်ကျေးရွာအတွင်းရှိ လူနေအိမ်များကို အကြမ်းဖက်စစ်တပ်၏ တပ်မ (၇၇) တပ်သားတွေက ဖောက်ထွင်းပြီး အိမ်ထဲရှိ အဖိုးတန်ပစ္စည်းများကို ခိုးယူခဲ့ကြောင်း သိရပါတယ်။
ဂန့်ဂေါ်ဖက်မှ တက်လာသော တပ်မ (၇၇)ဟာ မေလ ၅ရက်နေ့တွင် မာလ်ဆောမ်ကျေးရွာကို ရောက်ရှိကြပြီး ၅ရက်ကြာ ရွာထဲ၌ တပ်ဆွဲခဲ့ပါတယ်။
မာလ်ဆောမ်နှစ်ခြင်းဘုရားကျောင်းနဲ့ ယုံကြည်သူအသင်းတော် ဘုရားကျောင်းများတွင် အကြမ်းဖက်စစ်သားများ ညအိပ်ကာ ဘုရားကျောင်းထဲမှာပင် ချက်ပြုတ်စားသောက်ခဲ့ကြပါတယ်။
မာလ်ဆောမ်ကျေးရွာသည် ဟားခါးမြို့နဲ့ ၃၅မိုင်ခန့်အကွာတွင် တည်ရှိပြီး အိမ်ခြေ ၅၀ခန့်၊ လူဦးရေ ၂၅၀ ၀န်းကျင်နေထိုင်ကြပါတယ်။ ဧပြီ ၃၀ရက်နေ့မှာ ရွာသားအားလုံး ဘေးလွက်ရာကို ထွက်ပြေးခဲ့ကြပါတယ်။
အကြမ်းဖက်စစ်သားတွေ မာလ်ဆောမ်ရွာကိုမ၀င်ရောက်ခင်မှာ အကြမ်းဖက်စစ်တပ်က တိုက်လေယာဉ်နဲ့ ရွာထဲကို ၂ကြီမ် ဗုံးကြဲခဲ့ပါတယ်။ အဆိုပါ ဗုံးကြဲမှုတွင် ရွာထဲရှိ နှစ်ခြင်းဘုရားကျောင်းအဆောက်အအုံနဲ့ လူနေအိမ်တစ်ချို့ ပျက်ဆီးခဲ့ပါတယ်။
မေလ ၉ရက်နေ့တွင် အကြမ်းဖက်စစ်သားတွေ မာလ်ဆောမ်ရွာကနေ ဟားခါးမြို့ဖက်ကို ထွက်ခွာခဲ့ကြတယ်လို့ သိရပါတယ်။
